Hebro 5

1 Parti si mga gilalabawi paraghalad, pirmi to nagpili’ tikang si mga igkasi a’a-na ngan nagtu’inan to pagtunggo para si mga a’a si mga kinahanglanon pan Diyos. Iya liwat i nagtu’inan pagpahalad si mga rigalu-na si a’a pati’ pagbuno’ si mga papahalaron para apasaylo i mga sala’. 2 Ngan akahimo iya pagparapaki’angay si mga a’a nga ga’i agpakatu’anan si tama’ hasta nga agpamalisa na dina, tungod kay mismo iya aniya’ may liwat mga kaluyahan-na. 3 Sanglit iyay nan i rason kon ay kay kinahanglan iya dahulo agbuno’ papahalaron para si mga kalugaringun-na sala’ mangno iya na dina i para si mga sala’-na si mga a’a. 4 Gana’ ato maglugaring pagpa’unra mismo si kalugaringun-na para sinan katungdanan, lugod kinahanglan i Diyos i mag’agda si iya pagtu’in sinan pariho si Aaron. 5 Ngan da’inan may si Kristo, ga’i aglugaringan-na pag’angkon i maka’angayan pwisto si pagkagilalabawi paraghalad. Lugod agpinugad-na iya si Diyos, “Ka’aw i Dadi’-ko; ina’anto publikar-ko nga ako i Tatay-mo." 6 Si la’in namay parti si Kasuratan, agpinugad iya, “Paraghalad kaw hasta si kahastahan, irog si pagkaparaghalad-na si Melquisedec." 7 Ngan ato pa si Jesus si kalibutan, agpara’ampo’ iya ngan agparapalako bawa i gasod pati’ panangis ngan sigi iya pakimalu’oy si Addangan hamok nga makasalbar si iya si kamatayon. Tungod si pagkamatinahapun-na huwang i pagkamasinunuron, agpamati’an-na iya si Diyos. 8 Pero bisan kon dadi’ iya, ag’adal iya si pagkamasinunuron pina’agi si mga sa’agihan-na kakurihan. 9 Pakatuman-na si dimu’an nga akapamatgas si kina’iya-na, iya i mahimo pu’un-na si katalwasan nga gana’ katapusan-na para si dimu’an nga masinunuron may si iya. 10 Pwira pa sinan, iya liwat i nagtu’inan-na si Diyos bilang gilalabawi paraghalad irog si pagkaparaghalad-na siray si Melquisedec. 11 Malabbat pa kunta’ i parahallingun-ko hi’unong si nagsabi-koy ray pa hamok pero bali kuri pag’isplikar tungod kay hubya’ kam pagsantop si mga sapamati’an-bi na. 12 Si kamatu’uran, si ina’anto pwidi na kam kunta’ agpanturo’ kundi’ agkinahanglan pa kam hamok gihapon nga aniya’ si ka’am utro magturo’ si allingun-na si Diyos i parti si kamatu’uran nga mga mababaw hamok nagsantop. Gatas pa i nagkinahanglan-bi, ma’in pa kam angay si mabaskog pagkakan! 13 Bisan say nga padayon si gatas hamok, pariho si adda dadi’-dadi’, ma’in pa iya sayod hi’unong si turo’ parti si pagkamatadong. 14 Pero i mabaskog pagkakan para may si mga matgas na nga gara’ na pagkilala si mahalap kuntra si mara’at tungod si malalom isip pagturutimbang.